由1987年開業至今,隱身於東京高圓寺車站附近超人氣天婦羅丼飯專門店 「天すけ(天助)」於當地非常受歡迎,一定要放入你嘅東京美食Bucket List!其招牌菜炸蛋天婦羅丼飯 「 玉子ランチ 」 連日本當地電視台同森美都極力推介,可想而知其好食程度!
乘搭JR中央線至高圓寺站,由北口出站後向西商店方向行2分鐘左右就見到 「天すけ」隱身處!店鋪面積唔大,呈狹窄長方形座位設計,一眼睇哂可以坐10~12個人左右。由於坐位有限,所以難免需要排隊!輪候時間需半小時至一小時不等,人太多時有機會要等更耐!所以如果唔想排太耐隊,建議開店前半小時大約早上11:30開始嚟到店前排隊,有可能可以做第一Round入去嘅食客! 「天すけ」 中午12時開始營業,中午時段由12PM~2PM(有時會因應假日而延長至3PM),如果太遲排隊可能會錯過中午營業時段! 由於 Lunch不接受預約,晚飯時段就由晚上6PM~10PM,而營業時間同法定節假日可能會有所改變,大家去之前記得再睇睇當日最新安排!
如果係遊客,店員會比英文餐牌你,上面主要為招牌菜炸蛋天婦羅丼飯 「 玉子ランチ 」 等較為熱門菜式,如果想點其他食物,就要睇返店入面掛住嘅木牌喇! 炸蛋天婦羅丼飯有2種選擇,一種就係天婦羅放喺炸蛋丼飯一齊上,另一種就係分開上嘅定食Set!2種價錢一樣,為1500yen(約HK$107):有炸蛋丼飯、7款天婦羅、小生菜同味噌湯,好豐富!老闆同呀仔會喺你面前新鮮烹製, 蝦、魚、茄子、南瓜天婦羅會遂一上碟,唔怕淋哂入口仍然保持酥脆!成餐飯最最最重要就係半熟炸雞蛋同特製醬汁白飯嘅超強配搭! 炸蛋白邊好酥脆,半熟蛋黃汁撈埋白飯一齊食嘅同時,不斷聽到其他食客大讚好好味!成個Set份量比較多,白飯女仔可能食到一半已經好飽,因為7款天婦羅件件都好足料,好大件!
當你食緊嘅時候, 老闆好搞笑會係你面前表演「打雞蛋」Show!佢會不斷提醒你表演即將開始,要你拎定電話出嚟幫佢拍片!東京之旅記得唔好錯過天婦羅丼飯專門店 「天すけ(天助)」,有得食有得睇真係值得一試!
No Comments