去韓國釜山旅行，可以試吓韓國首個高空單車「Exciting Cycling」，新奇刺激你準備好未？位於釜山嘅金海伽倻主題公園（김해가야테마파크）推出咗全新極限運動體驗，等你可以喺 22m高空、大約7層樓高嘅踩住單車來回 ，成條單車賽道總距離有成500米咁長！
主題公園嘅高空單車共設有6條賽道，啱哂同一大班朋友一齊比賽！全程僅靠安全裝置同腳下面一條繩，望一望腳底咪話唔腳仔軟！如果淡定嘅朋友，可以同時欣賞埋金海市同盆城山嘅周邊靚景，咁樣睇風景應該係第一次啊！
高空踩單車滿足唔到你嘅，金海伽倻主題公園仲有另一款極限運動 -「Exciting Tower」，為韓國最大規模嘅歷奇設施！成座設施離地15m 即大約5層樓高度，你可以喺塔上大玩72項超刺激過關任務包括：過吊橋、呼拉圈、輪胎等障礙物、穿吊環、爬木桶等，考你平衡力之餘又考你膽量！
主題公園入場費用連上述兩個運動門票售價為33,000韓元，大約HK$218玩足成日好抵玩！嚟緊會去釜山嘅朋友又多一個遊樂選擇喇！
Source : 김해가야테마파크
No Comments