恭喜發財!新一年想行好運就要留意以下10個年初一禁忌,lalaShareS 在此祝大家新嘅一年出入平安、身體健康、萬事如意!
- 忌洗衫、沖澡、洗頭
年初一切忌洗衫、沖涼、洗頭,因為會將運氣、財運都洗走。而且「洗」同「死」發音好似,唔好意頭。另外亦有傳初一、二係水神生日,所以唔可以洗衫㗎! - 忌打爛嘢
年初一唔小心打爛嘢,好似杯杯碟碟,今年就會破財運。不過都有補救方法,用紅色嘅紙包起打爛嘅嘢,再係心裡默默講聲「歲歲平安」吉祥語,如果屋企有神位,就可以放喺神位上等5日再掉喇。 - 忌叫人起身、忌對瞓覺嘅人拜年、忌瞓晏覺
年初一記得唔好叫人個全名催人起身,如果唔係對方新一年睇怕都會有人去催促佢做事。同樣地,如果對方仲瞓緊,你同佢拜年會令對方成年都臥病在床,所以拜年都係等佢醒啊!另外,年初一瞓晏覺會令你成年都懶懶散散,所以咪瞓晏覺啊! - 朝早忌食粥、肉、藥
年初一食粥,成年都貧窮嘅說法,係源自以前因為貧窮而食唔起飯先食粥嘅情況。而由於年初一係唔可以殺生,所以都切忌食肉要食素。年初一除非咁唔好彩病咗要食藥,健健康康係千祈唔好無喇喇食藥包括維他命丸,因為會有病成年嘅說法。 - 忌煮新飯
取年年有餘嘅意思,年初一唔可以煮新飯,要將年三十晚嘅團年飯菜留起年初一食,寓意上年嘅食物食唔哂,年年有餘。 - 忌打掃、灑水、倒垃圾
上面3項會將屋企福氣、財運通通掃光,亦有指會將財神爺送走!如果真係要掃地,就要由外往內掃,掃福氣、財運入屋喇! - 忌用刀剪、針線
傳統習俗中,刀、剪、針線呢類尖銳利器盡量唔好喺年初一使用,咁未來一年都唔會有皮肉受傷嘅危險!亦有講話用剪刀、指甲剪等等,係會剪斷自己嘅財路㗎! - 忌睇醫生
新年大吉大利,過年期間如無需要盡量唔好睇醫生,象徵新一年健健康康,無病無痛! - 忌追錢、欠錢
有謂「欠錢唔好欠過年」,如果欠錢欠過年或者過年追人錢都會令自己成年行衰運!亦有指如果初一借錢,成年都要周圍問人借錢,代表財富都借走哂! - 忌講唔吉利說話、忌鬧人
成日聽長輩講新年要講吉利說話,取大吉大利嘅意思。輸、病、衰、死呢類非常唔吉利嘅字就千祈唔好講出口,唔小心講咗出口,就要即刻話「大吉利是」化解不祥喇!
No Comments