你有無諗過91歲嘅時候你嘅生活會係點?日本有位91歲婆婆セツ就喺佢91歲時,展開咗佢「撕紙拼貼畫」嘅藝術創作生涯!雖然セツ婆婆從來無接受過任何藝術創作相關嘅訓練,但屋企人從佢日常生活如食物嘅擺盤、神台花卉嘅裝飾等等都可以感受到婆婆對藝術嘅熱誠同天份!
セツ婆婆每日都會創作「撕紙拼貼」,由每朝早讀完報紙後,就會開始將報紙根據冷、暖色系分開擺放,為日後取材之用。每份明信片大小嘅作品通常需要6個鐘左右完成,セツ婆婆周不時會因為過份投入而廢寢忘餐,有時甚至會做到零晨1點。
セツ婆婆嘅作品色彩柔和,帶點平淡,彷彿靜俏俏帶出其91年嘅人生歷練。婆婆嘅作品由孫女分享至Twitter,唔少網友都非常欣賞同讚嘆婆婆嘅作品同堅持。但原來セツ婆婆背後創作原因係由於其老伴離世,頓時失去依靠。於是呀女建議佢可以利用報紙試試創作「撕紙拼貼畫」。就係咁,91歲嘅婆婆搵到人生另一個燦爛嘅新開始。一齊欣賞セツ婆婆充滿感情嘅作品喇!
Source : Twitter@setsu0107
No Comments